SWALI:
Assalam Aleykoum Warrahmatullah Wabarakatu.
Suala langu la kumpaka mtoto mchanga wanja au masizi usoni ili iwe ni kinga kwa macho ya watu na husda ua kumvisha uzi mweusi ni kinga? na kama si kinga tumfanyie nini iwe kinga tumsomee ayatul kursi asubuhi na jioni au? Na kama nimefanya hivyo jee ni shirki? Naomba ufafanuzi haraka sana asanteni Mola akuzidishieni elmu na taqwa AMIN.
JIBU:
Sifa zote njema Anastahiki Allaah Aliyetukuka Mola Mlezi wa walimwengu wote, Swalah na salamu zimshukie kipenzi chetu Mtume Muhammad (Swalla Allaahu ‘alayhi wa aalihi wa sallam) na Swahaba zake (Radhiya Allaahu ‘anhum) na watangu wema mpaka Siku ya Mwisho.
Shukrani zetu za dhati kwa swali lako kuhusu kumpaka mtoto mchanga wanja au masizi usoni kwa ajili ya kinga.
Hakika ni kuwa wanja ni dawa ya macho pekee wala si kinga ya hasadi. Kufanya hivyo, yaani kumpaka mtoto wanja au masizi usoni haifai kishari’ah kwani huko kunaingia katika shirki kwa kuufanya wanja na hayo masizi yanaweza yakamkinga mtoto.
Kinga ya mtoto ni kamaalivyotufundisha Mtume wa Allaah (Swalla Allaahu ‘alayhi wa aalihi wa sallam) kuwa tunaweza:
1. Mume anapokutana na mkewe wawe watasoma du’aa: “Allaahumma jannibniy-sh Shaytwaana wa jannibish Shaytwaana maa razaqtana. Akiruzukiwa mtoto hatadhurika na Shaytwaan” (al-Bukhaariy).
2. Kuwasomea watoto Suratul Ikhlaasw na kinga mbili (al-Falaq na an-Naas). Baada ya hapo kupuliza mkononi mwako na kuwapangusa mwili mzima.
3. Na njia nyingine ni kuwasomea du’aa za kinga kama aliyofanya Mtume (Swalla Allaahu ‘alayhi wa aalihi wa sallam) kwa wajukuu zake: “U‘idhukumaa bikalimaatiLlaahi at-Taammaati min kulli Shaytwaaniw wa haammah wa min kulli ‘aynil laammah” (al-Bukhaariy)
Maoni